بۇگىن تاڭەرتەڭ WhatsApp جەلىسى ارقىلى «تەزىرەك تەرەزەلەرىڭىزدى جابىڭىزدار. ءۇمز-دە اپات» دەگەن اقپارات جەلدەي ەسىپ, قالا تۇرعىندارى اراسىندا لەزدە تاراپ كەتكەن ەدى.
ءتۇس اۋا وسى جايتكە بايلانىستى ءۇلبى مەتاللۋرگيا زاۋىتىنىڭ وكىلدەرى تۇسىنىكتەمە بەردى. ولاردىڭ ايتۋىنشا, 2 جەلتوقساندا كاسىپورىننىڭ وندىرىستىك قالدىق ۇيىلگەن اۋماعىندا جۇمىس ىستەپ جاتقان 16 جۇمىسشىنىڭ 11-ىنەن ء«وزىمىزدى ناشار سەزىنىپ تۇرمىز, باسىمىز اينالىپ, جۇرەگىمىز اينىدى» دەگەن شاعىم ءتۇسىپ, بىردەن اۋرۋحاناعا جەتكىزىلگەن. كەلەڭسىز جاعدايدىڭ نەدەن بولعانىن انىقتاۋ ماقساتىندا ارنايى كوميسسيا قۇرىلىپتى. زاۋىت باسشىلىعى جۇمىسشىلار ۋلانعان اۋماقتىڭ اۋا قۇرامىنا زەرتتەۋ جۇرگىزگەندىكتەرىن, الايدا ونىدىرىستىك قالدىق ساقتالعان جەردە شەكتى مولشەردەن ارتىق اۋىتقۋشىلىق انىقتالماعانىن ايتادى. «كەشەلى بەرى ولار ەم قابىلداپ جاتىر. ال جۇمىسشىلاردىڭ دەنساۋلىعىنا نەدەن زيان كەلگەنى ءبىر-ەكى كۇندە زەرتحانالىق تەكسەرۋدەن سوڭ ناقتى انىقتالادى» دەيدى زاۋىتتىڭ باس ينجەنەرى سەرگەي بەجەتسكي.
وسكەمەن
